الاثنين، أبريل 07، 2008

ماذا يحدث في المحلة؟ محاولة للفهم من محلاوي مغترب

للاسف انا مضطر لمغادرة المنزل الان وكنت اود ان اكتب بتركيز اكبر عما يحدث في المحلة الان

اتصلت بصديقي محمد عبد الرحمن وهو يعيش في اطراف المحلة بعيدا عن الاحداث
قال لي انه ذهب سريعا لزيارة والدته في شارع القوتلي
وشاهد من شرفة منزلة مجموعة شباب عاديين يقفون في الشارع
وشارع القوتلي تقدر تقول انه شارع فرافير يعني دول شباب عاديين جدا
فجأة عربية امن رمت عليهم قنبلة مسيلة للدموع

على يوتوب الشباب يرفع فيديوهات لما يحدث في المحلة كل الحين والحين
هذا فيديو لاعتقالات عشوائية امام قسم اول



اخيرا تم قطع الكهرباء عن شارع البحر والشون ومنطقة قسم اول
واضح طبعا ان قطع الكهرباء سوف يحرمنا حتى من متابعة فيديوهات يوتوب التي تعد الان المصدر الاخباري الحي الوحيد لما يحدث
ما حدث في المحلة ليس من عمل بلطجية كما يتوهم البعض
الفرق بس ان مستوى المظاهرات في المحلة كان مرتفع جدا
والامن اضطر انه يرد بغباء
وطبيعي ان الناس تثور كرد فعل
الناس بتشتم في حسني علنا
تستطيع مثلا تمييز
يا جمال يا بن ابوك
المحلة بيكرهوك
صديقي محمد من المحلة يقول لي المحلات مغلقة وهناك حالة تشبه حظر التجول في الاطراف البعيدة
لو استمر الوضع كذلك لايام فكيف سيشتري الناس طعامهم؟
ده طبعا للي معاهم تمن الاكل
قوات امن اتت من المدن المجاورة بعد عجز الامن في المحلة عن احتواء الموقف
هم بيحسبوا ان بعد الاعتقالات العشوائية دي الناس هتسكت؟
واللي له اخ او اب اتسجن وما يعرفش عنه حاجة هيعمل ايه؟
مش هيرمي الامن بالطوب
مش هيطلع يشتم حسني مبارك؟
والشباب اللي بيتحدف عليه قنابل مسيلة للدموع لمجرد انه واقف في الشارع، مش هيحس بالقهر زيادة عما هو حاسس بيه اساسا؟
مش هيسخن وممكن يفقد اعصابه؟
معقول مصر كلها تسيب مدينة واحدة اهلها يعبروا عن كل مصري؟

هناك 4 تعليقات:

Rain_Drops يقول...

مش المحلة بس يا شدو ، التوتر في المحلة بس كان سببه سبقها للإضرابات من أيام شركات الغزل ، و الأمن برضو كان مبيتلهم النية و عايز ينتقم ، بس اتصيتو انتو يا عم و بقت المحلة على كل القنوات الفضائية

هي ايه حكاية شارع البحر دي ، انتو ماعندكوش نيل في المحلة ايه لزمة النصب دا ؟ ولا مجرد إحساس بالحرمان لما تنزلو المنصورة ؟
:d

A.SAMIR يقول...

الامن المصري بيتميز على مستوع العالم ان افراده بيسلموا دماغهم وهم داخلين من باب كلية الشرطة
تحياتي

Mohamed Shedou محمد شدو يقول...

عارف يا محمود بس الامور في المحلة وصلت لشكل مختلف خالص عن الاماكن التانية
لان الوضع على مستوى مدينة كاملة

شارع البحر ده الشارع الاساسي في المحلة
انت عمرك ما نزلت المحلة ولا ايه؟
يظهر كان مكانه ترعة او حاجة في زمن قديم

Mohamed Shedou محمد شدو يقول...

a. samir

طبعا كثرة بتسلم دماغها
وكثرة فرحانة بمشاعر السلطة فوق الناس
وقلة محترمة في الوسط تأثيرها ضعيف

تابع جديد المدونة على بريدك الالكتروني

أرشيف المدونة

مرحباً بالزائرين