الثلاثاء، يناير 08، 2008

يوم الصور: طرق متعرجة

هذه صور جمعتها من بين صوري، يجمع بينها أنها تصور هذه الطريق المتعرجة، كما ترى. وفي الطرق كثيرة الانحناءات شيء من جمال مبهم، ربما هو جمال التغير الدائم والحركة النشيطة. وفيها أيضاً جمال المفاجأة، أو المجهول، فإنك ترى جانباً من الطريق، فلا تعلم ما كان وراءه، وتجهل ما يأتي منه.



هذا المشهد للطريق كالحياة تماماً، لا تعلم ما ستكسب فيها غداً، ولا أقرب من غد!

هناك 21 تعليقًا:

Rain_Drops يقول...

أهو أنا دلوقتي بس فهمت السبب في كثرة الحوادث المرورية عندكم :d

Mohamed Shedou محمد شدو يقول...

:)

بس مش ده بس السبب برضه
توهان عقول الناس لا يزال السبب الاكبر

سها السباعي يقول...

الشكل المنحني عموما فيه انسيابيه وتلقائية غير خط المسطرة
عشان كده في حصة الرسم واحنا صغيرين كان ممنوع استخدام المسطرة
حتى لو هارسم بيت او عمارة

وطبعا الطرق هناك غير الطرق هنا
لما باشوف الافلام الامريكية والاقي اللي بيسافر من الشرق للغرب بالتلات اربع ايام
باحدهم
اصلي باحب سكة السفر

تحياتي وشكرا لمشاركتنا الصور الجميلة

Mohamed Shedou محمد شدو يقول...

سها

فعلا، المنحنيات فيها انسيابية توحي بالتلقائية
هذا تفسير لجمالها

والسفر لايام طويلة فعلا متعة
وانا سافرت مرتين
من الشمال للجنوب ومن الجنوب للشمال
حوالي 1400 ميل كل مرة
وحدي تماما
تجربة حلوة
وممكن تكون احلى لو مجموعة وعندها فرصة تقف في اماكن مختلفة على الطريق

مصر ممكن تبقى كده بس المشكلة في الطرق
عشان كده من ضمن خططي لو بقيت رئيس جمهورية انشاء شبكة طرق حديثة
:)

Unknown يقول...

مممممممم
عموما انا مبحبش الطرق الملتويه
بس حقيقى تصويرك تحفه والصور الى تحت دى كمان جميله اوى
شوف بقى ياعم
انا ايه اعمل معاك بيزنيس
مش بيزنس اوى نقول اتفاق
مش اتفاق اوى برضه نقول فرصه
انا بطلب من حضرتك تشترك معانا فى مدونة الا رسولى
http://elarasoly.blogspot.com/
على فكره مدونتك حلوه قصدى مدوناتك انا اخدت لفه كده على السريع
يلا مستنينك
سوق على مهلك
سلام يا ريس

Mohamed Shedou محمد شدو يقول...

دكتورة لماضة

اهلا بيكي في المدونة
وفي المدونات الثلاثة كلها

اما موضوع مشاركتي في مدونة الا رسولي
فشكرا جزيلا على الدعوة الجميلة
لكن الحقيقة انا اساسا مش قادر الاحق على المدونات التلاتة اللي بحاول اكتب فيهم
ازاي هكتب في رابعة دلوقتي؟

وبجانب ده عندي كمان خاطرين او فكرتين احب اشاركك فيهم

اولا انا لما فتحت المدونة لاقيتها حاطة عنوان عريض فوق عن مقاطعة المنتجات الدانمركية عشان الرسوم اياها

وانا ليا وجهة نظر مخالفة للتوجه ده اساسا
ولو تحبي انا كنت اتكلمت شوية عن موضوع الرسومات دي هنا
http://mshedou.blogspot.com/2006/02/blog-post_06.html

وكمان اضافة صغيرة هنا
http://mshedou.blogspot.com/2006/02/blog-post_12.html

غير ان مش من الاسلام اننا نعاقب ناس على فعل واحد منهم
والرسام نفسه كان له رسم سابق برضه بيحمل نفس الايحاءات عن الارهاب اليهودي
ومش في صالح حد اننا نفضل فاكرين موضوع زي ده وشاغلين نفسنا بيه
والحقيقة اللي بيهينوا الرسول اكتر في رايي هم المسلمين من حكام ومحكومين لما تبقى بلادهم بهذه الحال
المتدهورة

كمان انا مش مع اتهام الغرب دائما ونعتهم بمنعدمي الاخلاق والكلام ده

بس انا بكتب من وقت للتاني في مدونة
why i am muslim

اللي اقدر اعمله اني ممكن لو كتبت حاجة فيها عن الرسول اعيد نشرها في مدونة الا رسولي برضه
لاني طاقة الكتابية في هذه الايام زي ما قلت في الاول
لن تسعفني في الكتابة في ثلاثة مدونات
:)

وعلى فكرة احب انك كمان تبصي على مواضيعي الصحية بما انك طبيبة مصرية مستقبلية
:)

Unknown يقول...

والله يا استاذى محمد انا برضه متفقه تماما معاك فى موضوع المقاطعه ده
بسلوحضرتك بصيت انا مش لوحدى مشتركه فيها فيه اكتر من 10 مشتركين وانا فعلا مش عارفه مين حط الجمله دى
والهدف من المدونه انه نعرف الناس كلها خصوصا الغرب برسولنا الكريم مش بس التركيز على الرسومات المسيئه
اللينكات اللى قلتلى عليها دى هشوفهاحاضر
بس ارجع من الصيدليه بالليل واشوفها على رواقه مع كباية الشاى بلبن
انت عارف طموح الشباب اللى زى حلاتى نفسه يبقى دكتور شاطر فعلا ويشرف بلده ودينه وينفع بيه الامه ان شاء الله
عشان كده بحاول انزل صيدليه اتعرف على انوع الادويه عشان لما اكتبها للناس ابقى عارفه بعمل ايه وكمان لما حد بيقولى بياخ ايه ابقى عارفه ده فين انت عارف التعليم هنا عامل ازاى للاسف
لى عودة ان شاء الله
وسعيده باهتمامك جدااا

Rain_Drops يقول...

و الله فكرة جميلة لو ينفع حد بس يترجم مجموعة الأحاديث بتاعت التواضع و حسن الخلق اللي عندي خصوصا إن مواضيعها تنفع في مدونة زي إلا رسولي

ما تعرفش انت ترجمهالنا يا أبو الأشداد ؟

Mohamed Shedou محمد شدو يقول...

د. لماضة

سعيد بمعرفة رأيك في المقاطعة
وانا افهم طبعا ان هناك اكثر من مشارك وان لكل رأيه
ولكن انا لا احب ان اكون جزءا من مشروع فكري الا اذا كنت متوافقا مع التوجهات الاساسية فيه

كمان المهم في الموضوع ان المدونة وفيها بعض المواضيع بالعربي وبعضها الاخر بالانجليزي لن تصل للقاريء الغربي بالشكل الذي نتصوره
فهي نقطة صغيرة في بحر الانترنت الشاسع
ولو اردنا ان نصل لاحد فالموضوع يحتاج لمحتوى كفء ودعاية الخ
وبخصوص المحتوى
الحوار مع العقلية الغربية مختلف تماما عن الحوار مع مسلم اخر مثلا
وكثيرون من الذين يظنون انهم يتوجهون بخطابهم للغرب لا يكلمون الا انفسهم في الحقيقة
والحل؟ هقول وجهة نظري كمان شوية في رد مشترك عليكي وعلى صديقي محمود

لكن الاول عاوز اعلق على نشاطك التعلمي الطبي
وطبعا ده شيء جميل
وياريت تتابعيني لاني بحاول واحدة واحدة اني اتكلم عن اتجاه في الطب
احب ان اطباء مصر القادمين يبدأوا يهتموا بيه
وما دمتي انتي بتتعلمي وبتدوري
اقترح عليكي النظر في هذا الموقع لطبيب وكاتب امريكي رائد في مجال الطب المتكامل
integrative medicine
وده غير الطب البديل
alternative medicine
وعنوان موقعه اهه
www.drweil.com
بصي فيه لو حبيتي وخدي فكرة

Mohamed Shedou محمد شدو يقول...

محمود باشا

ما دام حضرتك مهتم
وبعد عرض لماضة

فانا تذكرت مشروع اخر وكنت هتكلم عنه هنا لكن قلت اعمل له تدوينة خاصة
ونتوكل على الله ونعرضه بمناسبة هذا الحديث

والمشروع قريب جدا من هذه الافكار لكنه اشمل

والمشروع اساسا يتوجه للغرب لانه عبارة عن مجلة تصدر في امريكا
والهدف ان تكون مطبوعة
ولكن الاسهل ان تبدأ على الانترنت

هستعين بالله واكتب تدوينة بالتفاصيل

Rain_Drops يقول...

و الله أنا نفسي من زمان أشارك في حاجة من النوع دا ، بس زي ما انت قلت دا محتاج يبقى بالإنجليزي بس و مركز شوية ، و أنا متخوف من موضوع اللغة ، أنا إنجليزيتي الطبية ممتازة و أفضل من إنجليزية الأمريكي و الإنجليزي العادي لإنهم مش بيفهمو معظم المصطلحات اللاتينية الأصل ، لكن إنجليزيتي السياسية هتلاقيها أقل شوية يعني ممكن أقف قدام كلمتين في كل مقال و الفضل في الأساس لمتابعتي البي بي سي و المقالات ، لكن إنجليزيتي في مجال الدين أضعف بكتيييير جدا لإن نوع الكلام هيبقى غريب عليا و عمري ما سمعته قبل كدا ، خد عندك لو حاولت تترجم : إن أكرمكم عند الله أتقاكم |أو حديث فيه كلمة زي التقوى أو الإحسان ، نوع الكلام نفسه عمره ما مر بيك قبل كدا و محتاج مساعدة أو شخص متخصص في المجال دا ، أنا أتأمل إنك تكون قريت كتب دينية بالإنجليزي خلال إقامتك هناك و بالتالي هتبقى أكثر قدرة مننا إنك تترجم مواضيع دينية ، ما تبخلش بمساعدتك دي على الشباب الغلبان اللي واقع في عرضك دا

:d

Unknown يقول...

بالظبط زى ما استاذ قطرات المطر قال
احنا محتاجين فكرك وخبرتك عنهم فى توصيل المعلومه
لو تقدر تساعد معانا ياريت حقيقى
على فكره فى مجلات سعوديه اهتمت بالمدونه
وكتير من المدونين عارفينها
بالنسبه للينكات مش عارفه اشكرك ازاى حقيقى
هشوفها طبعا واحفظها عندى
وواضح انا متفقين تماما فى الموضوع الطبى ده
حقيقى نفسى نحسن من مستوانا جدا ومن الطب فى مصر بشكل عام
وفى دماغنا مشروع صغير كدهانا وزمايلىيارب نقدر ننجح فكرته
عاوزين نعمل زى رابطه نسميها
medical ethics defenders
نبرز السلبيات والاجابيات فى المجتمع الطبى ككل
مش بس طب
لا صيدله واسنان وتمريض كمان
عاوزين نتمسك باخلاقيات المهنه ونحارب كل السلبيات الموجوده حاليا نبرز النماذج الجميله ونتعلم منها ونعممها
سعدت بالتواصل معاك حقيقى

Unknown يقول...

انا قريت ردك على الرسوم المسيئه للرسول
وحبيت افرحك ان اللى كنت بتقول عليه فكره مجنونه وحلم
فعلا اتحقق وحصل على ايد الاستاذ اشرف حمدى
وده لينك كل الاخبار استاذ اشرف حطها فى بوستات متتاليه
http://caricatooz.blogspot.com/2007_09_01_archive.html

MerMaid يقول...

عزيزي محمد شدو

اولا كيف حالك؟؟
الصور تحفة يا محمد بجد
و بجد الحياة مش سهلة زي ما احنا فاكرين
الحياة طريقا صعب و منحني
زي الطرق دي
ومحدش عارف هيقابله بكرة ايه
------------------
:))

نورتني
كل سنة وانت طيب

MerMaid يقول...

انت عاوز تبقي رئيس جمهورية؟؟؟
وبتقولها علنا كدة؟؟
طيب كويس انك في اميركا

علشان نضمن انك هتكمل في مشوار الانتخابات الرئاسية ده

:))

Rain_Drops يقول...

لا ما تخافوش على شدو هو ناوي أول ما ينجح أصلا يغير إسمه لـ : محمد شدو مبارك
:d
يا ريت مع موضوع إبراز السلبيات و الإيجابيات دا تعملو دليل صغير كدا لأشهر الأخطاء الطبية اللي بتتعمل ، لإنه اتضح لي مؤخرا إن دكتورين سنان مختلفين مشهورين اتسببولي أنا و عمي في خراجين فوق سناننا عشان نسيو يحشو العصب ، و عجبي
أنا عارف ايه اللي مادخلنيش طب أسنان عشان أفوق للناس دي

Rain_Drops يقول...

على الأقل كان زماني حشيت عصبي لنفسي

أنا جايلك أمريكا يا شدو ، و هجيلك بخراجي كمان

Mohamed Shedou محمد شدو يقول...

محمود باشا

انا شايف ان انجليزيتك ممتازة
واللغة مش مجرد مفردات الواحد عارفها او مش عارفها
المهم القدرة على التعبير وبناء الجمل وكده

وانا اساسا شغال بالانجليزي بتاع اعدادي
:)
لاني اساسا ما كنتش بذاكر في المرحلة الثانوية ولا بفتح كتاب
وبعدين درست فرنساوي
ولما جيت امريكا بقى كنت مضطر اقرا بالانجليزي مافيش غيره

اما الكتب الدينية فقرايتي فيها محدودة برضه
لكن دا مش مشكلة

وللموضوع بقية

Mohamed Shedou محمد شدو يقول...

د. لماضة

احنا محتاجين فكرك وخبرتك عنهم فى توصيل المعلومه
لو تقدر تساعد معانا ياريت حقيقى

بصي انا الموضوع ده خلاني زي ما قلت قبل كده افتكر مشروعين في ذهني من زمان وكنت بفكر اكتب عنهم او اتكلم عنهم مع المهتمين الاول وبعدين اعلن عنهم

لكن بالنسبة لمدونة الا رسولي
فانا ممكن اديكي دلوقتي رأيي في ايه اللي ناقصها عشان فعلا تكون فعالة وما تكونش عبارة عن مسلمين عمالين يكلموا نفسهم

وعلى فكرة انا قريت شوية من الحاجات اللي انتي كاتباها بالانجليزي وانا شايف انها ممتازة واتجاهها كويس جدا

المهم
اول حاجة عشان المدونة تكون فعالة هو المظهر بتاعها
يعني لازم التصميم يكون اكثر احترافية

ثانيا
لغة المدونة المفروض تكون واحدة
لو انجليزي يبقى كل مواضيعها بالانجليزي وما فيش مواضيع عربي
وكمان يبقى التوجه بتاع المدونة للقاريء الغربي او غير العربي
ومن ثم مش هينفع يبقى فيها اعلان من مقاطعة المنتجات الدانمركية مثلا
لان ما ينفعش نقولهم قاطعوا نفسكم

ثالثا اسم المدونة ما دامت موجهة للقاريء الغربي يبقى اسمها برضه يكون بالانجليزي ويكون اسم يعبر عن موضوعها
غير ان الاسم كمان لو بالانجليزي هيخلي المدونة لها وضع احسن على مواقع البحث زي جوجول
وبالتالي ممكن حد يلاقيها وهو بيدور على مواضيع اسلامية بكلمات بحث انجليزية

الافضل كمان ان المدونة يكون لها اسم نطاق خاص

بعد ما التفاصيل دي تتعمل والمحتوي بتاع المدونة يبقى موجه للقاريء الغربي بلغته
ساعتها بقى يبقى فيه جهد دعائي لها

ده تصوري عن المدونة دي لو عاوزين تكملوها كمدونة موجهة للقاريء غير العربي غير المسلم

كمان شكر ا جزيلا انك قلتيلي على الموضوع اللي عمله اشرف حمدي وعلى اللينك
انا ما كنتش اعرف
شيء جميل جدا وانا هقراه ان شاء الله وجايز ابقى اشير له في مدونتي الانجليزية

اما المبادرة الخاصة بالطب فانا اشجعها تماما وجدا وكثيرا
!
وممكن يكون الامل في الجيل ده ان شاء الله في تغيير واقع بلادنا واسترداد عجلة القيادة من الافاقين والنصابين والسارقين
!!

Mohamed Shedou محمد شدو يقول...

mermaid

صديقتي العزيزة
فعلا الحياة مش سهلة
لكن عارفة ايه اللي مش سهل فيها؟
تعامل كل واحد منا مع نفسه هو في رأيي اصعب شيء
الحياة نفسها سهلة لو احنا اتحكمنا في نفسنا
تغيير الأرض كلها يبدأ من نفس الانسان
!

وبعدين وفيها ايه لما ابقى رئيس جمهورية
بصي اصل الموضوع اني عاوز اخلص
يعني بدل ما اقعد اكتب واتكلم
الرئاسة تخلي الواحد يصلح على طول
بطل ما بقى كلام على الفاضي
:)

وانا اقلها علنا طبعا ما يهمنيش اي حد
انا طول عمري لساني بيجيب لي مشاكل والناس بتضايق وتخاف
لاني بحب انقد نقد علني
وانا في الواقع كمان اكثر حدة في نقدي مني في الكتابة

Mohamed Shedou محمد شدو يقول...

محمود

تف من بقك يا راجل
بقى انا برضه هخلي اسمي مبارك لا طبعا
انا شدو وسوف اظل شدو إلى الأبد

ده اسم مميز يا راجل
بالذمة عمرك قابلت اي شدو قبل كده؟
:)

تعالى امريكا يا باشا تشرف
تعالى معايا عشان نعمل مشاريع عظيمة
:)

تابع جديد المدونة على بريدك الالكتروني

أرشيف المدونة

مرحباً بالزائرين