الاثنين، يوليو 23، 2007

صيف الشمال

ما زال المطر يهبط من السماء على أرض مدينة إثاكا في شمال ولاية نيويورك، والتوقيت هو شهر يوليو، يعني عز الصيف. والمسألة مش مطر بس، لكن درجة الحرارة هبطت هي الأخرى مع هبوط المطر، واضطررت إلى ارتداء معطف يقيني البرد والبلل. الصيف هنا لا يستقر على حال، لذلك أحتفظ في سيارتي بمعطف وبلوفر وشمسية، حتى ونحن في عز الصيف. الليلة مثلا سوف تكون درجة الحرارة الصغرى 11 درجة مئوية، وهي الآن-التاسعة مساء-حوالي 15 درجة مئوية.

حين يهبط المطر وأنا مضطر للحركة في الخارج أضيق به، ولكني أعود وأحدث نفسي قائلاً أليس هذا المطر الذي أضيق به هو بعينه الذي ينبت كل هذه الخضرة التي تعزيني عن فقد أشياء أخرى!؟
فهل يريد حضرتي أن يستمتع بالثمرة دون بذر البذرة!؟
وكيف لي أن أستمتع بخضرة تغطي الأرض والجبال وتبث الجمال دون مطر يهبط بغزارة، صيفاً وشتاءً؟
وبمناسبة تقلب الأجواء، حيث يتحول الصيف إلى شتاء، هاكم صورة أخذتها يوم الخامس عشر من أبريل الماضي، اللي هو المفروض يكون ربيع. في هذا اليوم وكنت قد تهيأت نفسياً لتوديع الثلج والتزحلق على الطرقات-تزحلق غير إرادي طبعاً-وظننت أنني استرحت لشهور طويلة قادمة من تزحلق السيارة وهي هابطة على منحدر، أو عجزها عن صعود مطلع-وهكذا الحال حيث يجتمع الثلج والجبال، وفجأة اكفهرت السماء، وهبطت الثلوج البيضاء، وتحدت ظننا أننا قد ودعنا الشتاء
أما الصورة الثانية ففي الشتاء الماضي وقد قامت الثلوج بدفن السيارات، وأتى الأصدقاء يمدون يد العون كل لصاحبه لكي يخرجون مركباتنا من تحت الأنقاض البيضاء





هناك 6 تعليقات:

غير معرف يقول...

أولا يا سيدي كوبري بالفصحى تبقى جسر في الغالب مش لاقيلها معنى تاني ،ثانيا ما تفرحش قوي بكندا كمان سنة ماعادش هينفع يخترقوها كدا من أمريكا عادي هيحتاجو جواز سفر زي باقي البشر ثالثا كنت شفت فيلم وثائقي قبل كدا عن شرطة أوربا و عنصريتها تجاه المهاجرين كان في بريطانيا طبعا انت عارف قصة ثورة أبناء الضواحي في فرنسا بسبب الشابين اللي اتقتلو بس أميركا معروف إن تمييز الشرطة هناك منصب على الزنوج بس احمد ربنا إنك من عندنا لو كنت صعيدي أسمر و عملت حركة زي دي قدام الراجل كان جرجرك على أقرب تخشيبة:d

tota يقول...

محمد

عارف انك قلت الكلام اللى انا رديت بيه على حد قالى انتى عارفة ان غياب الشمس والمطر والجو ده بيعملنا اكتئاب انما انتم عندكم شمس ونور وده شىء مريح للاعصاب

رضيت نفس ردك بس انتم عندكم خضرة وجمال يغطى على اى اكتئاب واحنا عندنا حر وجفاف والخضرة البهتانة المتربة من قلة الميه تخلق ميت اكتئاب

يعنى ربنا عادل مشى بيدى لحد كل حاجة لكن فى النهاية الكفة بتكون موزونة
تعرف انى عمرى ما شوفت تلج فى حياتى مش غريبة دى اننا فى مصر عمرنا ما شوفنا الا مرة ان حد لمح بلورة تلج على حافة شباك الغرفة شايف الاعجاز

لولا الصور مكناش صدقنا ان فى حاجة اسمها تلج
اظن اننا لازم نستمتع بكل حاجة زى ما انت عملت كده بالضبط
لان الصيف فى مصر تخطى 45 درجة مستريح يبقى صيفكم ولا صيفنا

تحياتى

Mohamed Shedou محمد شدو يقول...

Anonymous
طيب مش تعرفنا على نفسك الاول
:)

أما الكوبري فأنا افتكرت فعلا في نص التدوينة انه بالعربية الفصحى يبقى جسر
كان شعور غريب فعلا وانا ناسي كلمة زي دي بالفصحى
!!

انا ما سمعتش عن موضوع ان كمان سنة ما عادش هينفع دخول كندا من غير جواز سفر
سمعت الكلام ده فين؟

Mohamed Shedou محمد شدو يقول...

tota

متشكرين على الزيارة، أتمنى تعتبري نفسك هنا في بيتك يعني
:)

الحقيقة انا مش عارف ايه اللي بيبعث على الاكتئاب أكتر
غياب الشمس أوقات طويلة
ولا التراب والحر والقبح؟؟

لا أنكر أني هنا كنت أشعر بالاكتئاب حين تغيب عني الشمس أسابيع

ولكني أيضاً كنت أضيق بشدة بغياب الجمال في مصر
وكنت أقول لنفسي
هذا مثل حي مرأي وملموس على الإفساد في الأرض
والقائمون على الأمور في مصر متخصصو إفساد في الأرض بأشكال مختلفة

لكن على الأقل غياب الشمس ومتاعب الجو أشياء خارجة عن إرادة الإنسان

غير معرف يقول...

أنا محمود يا سيدي آسف إني نسيت أوضح ، على فكرة أنا عملت لنفسي حساب على جوجل عشان أعرف أرد على صديقتك جيني - يللا يا عم انت قضيها شنكلة في البنات عندك لحد ما بوش هيطردك بنفسه - بالنسبة للكلام ف أنا سمعته من صديق أمريكي من آلاسكا طبعا كندا حيوية بالنسبة لهم و جارهم الوحيد ف صعب تكون إشاعة ، مسألة الكتب المسموعة أنا جربت كتاب طوق الحمامة و كتاب من سلسلة الولد الشقي لمحمود السعدني يمكن طوق الحمامة كان أفضل بالنسبة لي لكن انا شخص أصلا مقتنع إن القراءة لها لذة ما ينفعش حاجة تانية تعوضها - حتى صوت عبد الرحمن أبو زهرة - حاول تبحث عنهم في جوجل بس اكتب : الولد الشقي كتاب مسموع بالمناسبة ايه رأيك في القصتين ؟

Mohamed Shedou محمد شدو يقول...

أنا بعتلك رد على ايميلك يا محمود
ورأيي ان عندك موهبة اكيدة في الكتابة
اما الكتب المسموعة فدي كتب قديمة شوية اللي انت قلت عليها ومش حاسس انها ممكن تكون كويسة في السمع
خليني اسمع الكتب الانجليزي اللي عندي لحد ما ربنا يفرجها ويطلع حد يعملها صح عندنا

تابع جديد المدونة على بريدك الالكتروني

أرشيف المدونة

مرحباً بالزائرين